Saturday, 17 December 2016

ಮಲಗೂ ಮಲಗೆನ್ನಾ ಕಂದ

ಮಲಗೂ ನನ್ನಾ ಕಂದ
ಸೂರ್ಯ ಜಾರಿದ ಬಾನಿನಿಂದ
ತಾವರೆಯಂತೆ ಕಣ್ಣು ಮುದುರುತಿದೆ
ಆಯಾಸದಿಂದ ಮೊಗವು ಸೊರಗುತಿದೆ


ಮಲಗೂ ಮಲಗೆನ್ನಾ ಕಂದ
ಜೊಜೊ ಜೋಜೋ ಜೋಜೋ


ಮೆತ್ತಗೆ ಹಾಸಿದೆ ಬೆಚ್ಚಗೆ ಹೊದಿಸಿದೆ
ಸಣ್ಣನೆ ದೀಪವು ಕಗ್ಗತಲ ಮರೆಸಿದೆ
ಮೆಲ್ಲನೆ ಆಟಿಕೆಗಳ ಮರೆಯುತಲಿ
ಅಮ್ಮನ ಲಾಲಿ ಜೋಜೋ ಸವಿಯುತಲಿ


ಮಲಗೂ ಮಲಗೆನ್ನಾ ಕಂದ
ಜೊಜೊ ಜೋಜೋ ಜೋಜೋ


ಚಂದಿರ ಬಂದಿಹನು ನಕ್ಷತ್ರಗಳೊಡನೆ
ನಿದಿರೆಯ ತಂದಿಹನು ಸಿಹಿಗನಸುಗಳೊಡನೆ
ಶಾಂತಿಯ ಸಾರುವ ಬುದ್ಧನಂತೆ
ಮಲಗು ಚಿಪ್ಪಿನೊಳ ಮುತ್ತಿನಂತೆ


ಮಲಗೂ ಮಲಗೆನ್ನಾ ಕಂದ
ಜೊಜೊ ಜೋಜೋ ಜೋಜೋ


ಮಲಗೂ ನನ್ನಾ ಕಂದ
ಆಡುವ ನಾಳೆ ಆನಂದದಿಂದ
ಮಲಗೂ ಮಲಗೆನ್ನಾ ಕಂದ
ನೀಡುತ ನಗುವ ಮಕರಂದ

                                    - ಉಪಾಸನಾ

No comments:

Post a Comment